Thursday, October 13, 2011

တက္ကသိုလ်ဆိုတာ (၂) (တက္ကသိုလ်နှင့် တိုင်းပြည်ဖွံ့ဖြိုးရေး သုတေသနလုပ်ငန်း)



တက္ကသိုလ်ဆိုတာ (၂)

တက္ကသိုလ်နှင့် တိုင်းပြည်ဖွံ့ဖြိုးရေး သုတေသနလုပ်ငန်း
(သုတေသနနှင့်ဖွံ့ဖြိုးရေးအခန်းကဏ္ဍ)

ယနေ့ဖွံ့ဖြိုးတိုးတက်နေသော ကမ္ဘာကြီးဖြစ်ပေါ်လာဖို့အတွက် ခြေလှမ်းများစတင်ရာ ကနဦးအစကိုပြောရမည်ဆိုလျှင် ခရစ်နှစ် ၁၈၀၀ ၀န်းကျင်ခန့်တွင် စတင်ဖြစ်ပွားခဲ့သော စက်မှုတော်လှန်ရေး (Industrial Revolution) ကြီးပင်ဖြစ်လေသည်။ ထိုစက်မှုတော်လှန်ရေးကာလကြီးပြီးနောက် ၁၈၅၀ ခန့်တွင် ရေနွေးငွေ့အင်ဂျင်နှင့်မီးရထား (Steam and Rail) စတင်အသုံးပြုနိုင်ခြင်း၊ နောက် ၁၉၀၀ ၀န်းကျင်ခန့်တွင် လျှပ်စစ်စွမ်းအင်နှင့် အကြီးစားစက်မှုလုပ်ငန်းများ ပေါ်ပေါက်လာခြင်း(Electricity and Heavy Industry) ၊ ၁၉၅၀ တစ်ဝိုက်တွင် မော်တော်ကားနှင့် အစုလိုက်အပြုံလိုက်ကုန်ထုတ်လုပ်ငန်းများ (Automobiles and Mass Production) ပေါ်ပေါက်လာခြင်း စသည်ဖြင့် နှစ် ၅၀ ခန့်ခြားတွင် တစ်ကြိမ်ခန့် အံ့မခန်းနည်းပညာနှင့် ကုန်ထုတ်လုပ်မှုတိုးတက်ခြင်းတို့ ဖြစ်ပေါ်လာခဲ့လေသည်။ သို့သော် ၁၉၅၀ ခန့်မှစ၍ ယခုအချိန်အထိကာလတွင်တော့ အိုင်တီနည်းပညာဖွံ့ဖြိုးတိုးတက်လာမှု၊ မြန်ဆန်သောဆက်သွယ်ရေးနှင့် သတင်းအချက်အလက်တို့၏ကျေးဇူးကြောင့် ဘိုင်အိုနည်းပညာ၊နာနိုနည်းပညာ၊ ကွန်ပြူတာ၊ နူကလီးယား၊ မိုဘိုင်းဖုန်း အစရှိသည့်နယ်ပယ်စုံ အသီးသီးတို့တွင် နေ့စဉ်နှင့်အမျှလိုလိုပင် အသစ်အသစ်သော ရှာဖွေတွေ့ရှိမှုတို့သည် အံ့ချီးမကုန်နိုင်ပင်ဖြစ်လေသည်။

ထိုကဲ့သို့ ကမ္ဘာကြီးဖွံ့ဖြိုးတိုးတက်နေခြင်း၏နောက်ကွယ်တွင် အဓိကမောင်းနှင်ပေးနေသောအရာသည် နိုင်ငံအသီးသီးရှိ သုတေသနလုပ်ငန်းများပင်ဖြစ်လေသည်။ ကမ္ဘာ့ထိပ်တန်းကုမ္ပဏီအသီးသီးတွင် ထိပ်တန်းသုတေသနဌာနများရှိလေသည်။ ထိုသုတေသနဌာနများသည် ထိုကုမ္ပဏီ အောင်မြင်စွာရပ်တည်နိုင်ရေးအတွက် အသက်သွေးကြောပင်ဖြစ်လေသည်။ အနည်းငယ်မျှသော အမှားအယွင်းကလေးကပင် ကြီးမားသောဆုံးရှုံးမှုများကို ခါးစည်းခံရတတ်လေသည်။ ဥပမာပြရမည်ဆိုလျှင် မိုဘိုင်းဖုန်းလောကတွင် ဆယ်စုနှစ်နှင့်ချီ၍လွှမ်းမိုးထားသော Motorola၊ Nokia စသည့်ကုမ္ပဏီတို့သည် (စမတ်ဖုန်းများအသုံးတွင်ကျယ်လာမည်ကိုမယုံကြည်သဖြင့်) စမတ်ဖုန်း နည်းပညာသုတေသနလုပ်ငန်းများကို အသားပေးမလုပ်ဆောင်ခဲ့သဖြင့် ယခုအချိန်တွင် ဈေးကွက်ဝေစုမြောက်များစွာဆုံးရှုံးပြီး Apple နှင့် Samsung ကုမ္ပဏီတို့နောက်သို့ရောက်ခဲ့ရလေသည်။

သုတေသနဌာနဟူသည် အဆောက်အဦးကောင်းကောင်းနှင့် ဟိတ်ဟန်ကောင်းကောင်းပြရာနေရာမဟုတ်ပေ။ သက်ဆိုင်ရာနယ်ပယ်အတွက် အကျိုးရှိစေမည့်လုပ်ငန်းများကို လုပ်ကိုင်ရန်ရည်ရွယ်၍ အမှန်တကယ်စိတ်ဝင်စား၍ လုပ်ကိုင်နိုင်စွမ်းရှိသော ပညာရှင်များကို လွတ်လပ်စွာတွေးခေါ်ဆွေးနွေးနိုင်ရန် ရည်ရွယ်၍ထားရှိသောနေရာဌာနဖြစ်ပေသည်။ ထိုကဲ့သို့သောနေရာတို့တွင် တာဝန်ထမ်းဆောင်နိုင်သော ပညာရှင်အသီးသီးကို တက္ကသိုလ်များမှမွေးထုတ်ပေးလိုက်ခြင်းဖြစ်ပေသည်။

နိုင်ငံအသီးသီးရှိ တက္ကသိုလ်များ၏ အဓိကအခန်းကဏ္ဍသည် မိမိနိုင်ငံဖွံ့ဖြိုးတိုးတက်ရေးအတွက် သက်ဆိုင်ရာဘာသာရပ်အသီးသီးတွင် စာတွေ့လက်တွေ့နှံ့စပ်သော မျိုးဆက်သစ်ပညာသည်လူငယ်များ မွေးထုတ်ပေးရေးပင်ဖြစ်လေသည်။ ထိုသို့ပညာမျိုးဆက်မပြတ်လတ်ရေး အရေးကြီးခြင်းကိုသိရှိသည့်အတွက် အစိုးနှင့်အစိုးရမဟုတ်သော ကုမ္ပဏီလုပ်ငန်းများမှနေ၍ တက္ကသိုလ်အသီးသီးရှိဆိုင်ရာဌာနများကို ငွေကြေးများထောက်ပံ့ကာ မိမိတို့ကုမ္ပဏီ၏ သုတေသနဌာနခွဲများဖွင့်လှစ်ပေးလေ့ရှိလေသည်။ ထိုသုတေသနလုပ်ငန်းများမှ ကျောင်းသူ၊ကျောင်းသားများအား လက်တွေ့လုပ်ငန်းခွင်အတွေ့အကြုံနှင့် အသိအမြင်တို့ကို ရရှိစေလေသည်။

ကျောင်းတက်နေစဉ်ကာလအတွင်း ထိုကဲ့သို့သုတေသနလုပ်ငန်းများတွင် ပါဝင်ခွင့်ရရှိခြင်း၏ အဓိကအရေးအကြီးဆုံး ကောင်းကျိုးမှာ ကျောင်းသား၊သူများအနေဖြင့် ယခုလက်ရှိမိမိနိုင်ငံ၏ သုတေသနအဆင့်အတန်းနှင့် လားရာလမ်းကြောင်း(Research Status & Research Trend) ကို လုပ်ငန်းခွင်မ၀င်ခင်ကပင် ရင်းနှီးခွင့်ရခြင်းဖြစ်လေသည်။ နိုင်ငံတစ်နိုင်ငံတွင် တက္ကသိုလ်တစ်ခုတည်ထောင်ခြင်းသည် သစ်ပင်တစ်ပင်စိုက်ခြင်းနှင့်တူသည်ဆိုလျှင် သုတေသနနှင့်ဖွံ့ဖြိုးရေးလုပ်ငန်းများ လုပ်ဆောင်ခြင်းသည် ထိုအပင်ကြီးထွား၍ အပွင့်အခက်တို့ဝေဆာစေရန် ရေလောင်းပေါင်းသင်ခြင်းနှင့်တူပေလိမ့်မည်။ ထို့ကြောင့် တက္ကသိုလ်တစ်ခုတည်ထောင်သည်ဆိုပါက စာအုပ်ထဲရှိစာဖတ်ကာ သင်ကြားနေရုံဖြင့်တက္ကသိုလ်၏ကိစ္စပြီးစီးသည်မဟုတ်ပဲ သုတေသနနှင့်ဖွံ့ဖြိုးရေးလုပ်ငန်းများကို တွဲဖက်လုပ်ဆောင်နေမှသာလျှင် ယခုခေတ်နှင့်ညီသော တက္ကသိုလ်မည်ပေလိမ့်မည်။

No comments:

Post a Comment

ရွှင်လန်းချမ်းမြေ့ပါစေ။

Related Posts Plugin for WordPress, Blogger...