Wednesday, January 25, 2012

စာကြည့်တိုက်တစ်ခု ဖွံ့ဖြိုးတိုးတက်ဖို့



စာကြည့်တိုက် တစ်ခုကို ဖွံ့ဖြိုးအောင်လုပ်မယ်ဆိုရင် B ငါးလုံးကို သတိပြုရပါမယ်။
အဲဒါတွေကတော့

           (၁) Building စာကြည့်တိုက်အဆောက်အအုံ
           (၂) Book  စာကြည့်တိုက်မှာ ရှိရမဲ့စာအုပ်များ
           (၃) Borrower  စာအုပ်ငှားရမ်းဖတ်ရှုသူများ၊ စာကြည့်တိုက် အသုံးပြုသူများ
           (၄) Budget စာကြည့်တိုက်ကို အမြဲဆန်းသစ်တိုးတက်နေအောင်လုပ်ရမဲ့၊ လုပ်ရာမှာ
                နောက်ဆံမငင်ရမဲ့ စာကြည့်တိုက်ရံပုံငွေ
          (၅) Brain  စာကြည့်တိုက်ကို အမြဲသွက်လက်လည်ပတ်နေအောင် စည်းရုံးလှုံ့ဆော်
                ဆောင်ရွက်ပေးရမဲ့ စာကြည့်တိုက်မှူး၊ စာကြည့်တိုက်ကော်မီတီ တို့ဖြစ်ကြပါတယ်။

၁။ Building (စာကြည့်တိုက်အဆောက်အအုံ)

စာကြည့်တိုက်အဆောက်အအုံကို ရွေးချယ်စဉ်းစားရာမှာ အသုံးပြုသူ ဘယ်လောက်ရှိမလဲ၊ ကျေးရွာ အဆင့်လား၊ ကျောင်းအဆင့်လား၊ မြို့နယ်အဆင့်လား စသဖြင့် စဉ်းစားရပါမယ်။ စာအုပ်အမျိုးအစား ဘယ်လောက်အထိထားမယ်။ အသက်အရွယ်အလိုက်၊ ဘာသာရပ်အလိုက်၊ စာအုပ်အမျိုးအစားအလိုက်၊ မီဒီယာအမျိုးအစားအလိုက် ဘယ်လိုအခန်းဖွဲ့စည်းမယ်ဆိုတာစဉ်းစားရပါမယ်။ စာကြည့်တိုက်ဝင်ပေါက် ထွက်ပေါက်ကို ဘယ်လိုထားမယ်။ စာအုပ်ငှားမှတ်တမ်းကို ဘယ်နေရာကနေမှတ်တမ်းတင်မယ်။ စာကြည့်တိုက်ထဲကို ဖိနပ်စီးခွင့်ပြုမပြု၊ ဖိနပ်စီးခွင့်မပြုရင် ဖိနပ်ထားရမဲ့နေရာ၊ ထီး၊ ကိုယ်ပိုင်ယူလာတဲ့ စာအုပ်များကို စာကြည့်တိုက်ထဲယူခွင့်ပြုသင့်မသင့်၊ ခွင့်မပြုရင်ယူခွင့်မပြုတာတွေကို ထားရမဲ့ ထားစရာ နေရာပြုလုပ်ရပါမယ်။ စာကြည့်တိုက်အဆောက်အအုံက ပျဉ်ထောင်လား၊ တိုက်လား၊ စာအုပ်တွေကို ဘယ်လိုထားမလဲ၊ ဘီဒိုတွေကို ဘယ်အရွယ်လုပ်မလဲ ဘယ်လိုထားမလဲ စဉ်းစားရပါမယ်။ စာပေပြိုင်ပွဲ၊ စာပေဆွေးနွေးပွဲ၊ မီဒီယာခန်းထားမထားစဉ်းစားရပါမယ်။ လာရောက်မဲ့လူအရေအတွက်နဲ့သင့်တော်မဲ့ အိမ်သာ၊ သောက်ရေအိုးရှိရပါမယ်။ လောလောဆယ်ငွေကြေးအခက်အခဲကြောင့် သေးသေးကစမယ်။ နောက်တဖြေးဖြေး အဆင့်မြှင့်မယ်လို့ရည်မှန်းရင် မြေနေရာလွတ်ဘေးမှာရနိုင်တဲ့နေရာမျိုးကို ရွေးရပါမယ်။

၂။ Book  (စာကြည့်တိုက်မှာ ရှိရမဲ့စာအုပ်များ)

စာကြည့်တိုက်ရှိစာအုပ်များကို  အသက်အရွယ်မရွေး၊ လူမျိုးဘာသာမရွေးလာရောက်လေ့လာနိုင်အောင် ရွေးချယ်စုဆောင်းထားရှိရပါမယ်။ ကိုယ်လုပ်မဲ့စာကြည့်တိုက်နဲ့ သင့်တော်တဲ့ လိုက်ဖက်ဆက်စပ်တဲ့ သဘောလဲရှိရပါမယ်။
ကလေးများအတွက်ဆိုရင် ပုံပြင်စာအုပ်၊ ကလေးပန်းချီစာအုပ်၊ ကလေးများအတွက် ရည်ရွယ်ပြုစုတဲ့ သမိုင်း၊ ပထ၀ီ၊ ဘာသာရေး၊ ယဉ်ကျေးမှု၊ အထွေထွေသိပ်ပံ၊ စာအုပ်များရှိရပါမယ်။
အလယ်တန်းအထက်တန်းကျောင်းသားများအတွက် သူတို့နဲ့သင့်တော်တဲ့ ပုံပြင်၊ ကိုယ်ရေးရာဇ၀င်၊ အင်္ဂလိပ်စာ၊ သိပ်ပံပညာ ကွန်ပျူတာအခြေခံ စတာတွေ ရှိရပါမယ်။
တက်ကသိုလ်ကျောင်းသားတွေအတွက် ကဗျာ၊ ၀တ္ထု၊ ကိုယ်ရေးရာဇ၀င်၊ အတွေးအခေါ်၊ နိုင်ငံရေး၊ ဘာသာရေး၊ ဘာသာရပ်ဆိုင်ရာစာအုပ်အမျိုးမျိုး၊ စွယ်စုံကျမ်း စတာတွေရှိရပါမယ်။
ဘွဲ့ရပြီးသူများ၊ ကျောင်းဆက်မတက်သူများအတွက် လက်တွေ့အသက်မွေးဝမ်းကျောင်းပညာ၊ စိုက်ပျိုးမွေးမြူရေးပညာ၊ ကျန်းမာရေးအခြေခံပညာ၊ ဘာသာရေးစာပေ စတာတွေရှိရပါမယ်။
လူလတ်ပိုင်းနဲ့ လူကြီးပိုင်း စာဖတ်သူတွေအတွက် ဘာသာရေး၊ စာပေ၊ ယဉ်ကျေးမှု၊ နိုင်ငံရေး၊ ကျန်းမာရေး၊ သမိုင်း၊ အတွေးအခေါ်၊ မြန်မာ့ရေးရာ၊ နိုင်ငံတကာရေးရာ စတာတွေရှိရပါမယ်။

၃။ Borrower  (စာအုပ်ငှားရမ်းဖတ်ရှုသူများ၊ စာကြည့်တိုက် အသုံးပြုသူများ)

စာအုပ်တွေရှိပြီးစာဖတ်သူမရှိတဲ့ စာကြည့်တိုက်ဟာ အကျိုးမများပါဘူး။ စာကြည့်တိုက်ဟာ စာဖတ်သူတွေ လာချင်တဲ့နေရာ၊ စာကြည့်တိုက်ဟာ စာဖတ်သူများရဲ့မိတ်ဆွေဆိုတာသိအောင်လုပ်ရပါမယ်။ တခေါက်လာပြီး ရင်ထပ်ခါထပ်ခါလာချင်အောင် မလာသေးသူများကို သူတို့ကနေ ဆွဲခေါ်လာအောင်လုပ်ပေးနိုင်တဲ့ စာကြည့် တိုက်ဖြစ်ရပါမယ်။ စာကြည့်တိုက်ဖွင့်ချိန် ပိတ်ချိန်ဟာ စာဖတ်သူများအတွက် သင့်တော်တဲ့အချိန်ဖြစ်အောင် လုပ်ပေးရပါမယ်။ စာကြည့်တိုက်ဟာ ကျားမမရွေး၊ လူမျိုးဘာသာမရွေး အသုံးပြုနိုင်တဲ့ အကျိုးဖြစ်စေနိုင်တဲ့ နေရာဆိုတာ သိအောင်လုပ်ရပါမယ်။

၎။ Budget (စာကြည့်တိုက်ကို အမြဲဆန်းသစ်တိုးတက်နေအောင်လုပ်ရမဲ့၊   
    လုပ်ရာမှာနောက်ဆံမငင်ရမဲ့ စာကြည့်တိုက်ရံပုံငွေ)

စာကြည့်တိုက်ရှိစာအုပ်တွေဟာ ခေတ်နဲ့အညီ ဆန်းသစ်နေရပါမယ်။ အမြဲတန်းအသုံးဝင်အဖိုးတန်နေမဲ့ ရည်ညွှန်းစာအုပ်များကိုလဲ ဆက်လက်ထိမ်းသိမ်းရပါမယ်။ စာကြည့်တိုက်အဆောက်အဦ၊ စာအုပ်စင်၊ ပရိဘောဂ စတာတွေကလဲ အမြဲတည်တံ့အောင် ပြုပြင်ထိန်းသိမ်းပေးနေရပါမယ်။ စာကြည့်တိုက်လှုပ်ရှားမှုတွေအတွက် ကုန်ကျစရိတ် တွေ လျာထားပြီးစုဆောင်းရပါမယ်။ ဒါတွေအတွက်   ရံပုံငွေလိုပါတယ်။ ရံပုံငွေ စီမံခန့်ခွဲမှု အစီအစဉ်လိုပါတယ်။ အသင်းဝင်ကြေး၊ ရက်လွန်ကြေး၊ ကောက်ခံရတာလောက်နဲကတော့ စရိတ်မကာမိပါဘူး။ ပုံမှန်ဝင်ငွေရှိအောင် အလှူခံတဲ့အစီအစဉ်ရှိရပါမယ်။ စံနစ်တကျသုံးစွဲမှုရှိရပါမယ်။ လုံလောက်တဲ့ ရံပုံငွေမရှိရင် လိုအပ်တာတွေ သိပေမဲ့ လုပ်နိုင်မှာ မဟုတ်ပါ။

၅။ Brain  (စာကြည့်တိုက်ကို အမြဲသွက်လက်လည်ပတ်နေအောင် စည်းရုံးလှုံ့ဆော်
    ဆောင်ရွက်ပေးရမဲ့ စာကြည့်တိုက်မှူး၊ စာကြည့်တိုက်ကော်မီတီ)

စာကြည့်တိုက်မှူးဆိုတာ စာအုပ်စာရင်း၊ ထိန်းသိမ်းရမယ်။ စာအုပ်ငှားပေးရမယ်။ စာကြည့်တိုက်ကော်မီတီ ဆိုတာ စာအုပ်ဝယ်ပေးရမယ်။ အဆောက်အဦ။ မြေနေရာရှာပေးရမယ်။ အဲဒီလောက်ပဲလုပ်စရာလိုတယ်လို့ နားလည်ထားရင် စာကြည့်တိုက်ကောင်းတစ်ခုဖြစ်လာဖို့ အလှမ်းဝေးပါမယ်။
စာကြည့်တိုက်က အဆောက်အဦရှိရမယ်၊ စာအုပ်ရှိရမယ်၊ စာအုပ်ငှားသူရှိရမယ်ဆိုတဲ့ မျက်မြင်လိုအပ်ချက် တွေအပြင် စာကြည့်တိုက်မှူးရဲ့ ဥာဏ်အမျှော်အမြင်၊ စာကြည့်တိုက်ကော်မီတီရဲ့ စဉ်းစားတွေးခေါ်မှုစွမ်းရည် စတဲ့ မမြင်နိုင်တဲ့ အရည်အသွေးလိုအပ်ချက်များရှိမှ အောင်မြင်ပါမယ်။ စာကြည့်တိုက်မှူးကောင်း၊ စာကြည့်တိုက်ကော်မီတီကောင်းတွေဟာ စာကြည့်တိုက်ကို အများပြည်သူ အမြဲအားကိုးအားထားပြုနိုင်အောင် အစီအစဉ်အမျိုးမျိုး လုပ်ပေးရပါမယ်။ ပုံပြောပြိုင်ပွဲ၊ ဗဟုသုတပြိုင်ပွဲ၊ စာဖတ်စွမ်းရည်ပြိုင်ပွဲ၊ စာစီစာကုံးပြိုင်ပွဲ၊ စာပေဟောပြောပွဲ၊ တရားပွဲ၊ ဘာသာရပ်ဆိုင်ရာဟောပြောပွဲ၊ စာပေလေ့လာရေးခရီးစတာတွေ လုပ်ပေးရပါမယ်။ ကိုယ့်မှာရှိတဲ့ ရံပုံငွေနဲ့ လုပ်ပေးနိုင်သလောက် တဖြေးဖြေးလုပ်သွားဖို့ပါ အောင်မြင်မှန်းသိလာရင် အလှူငွေတွေ ပေါ်လာပါမယ်။ စိတ်ရှိသလောက်တိုးချဲ့နိုင်ပါမယ်။

ဒါကိုအကောင်အထည်ဖော်ပေးမယ့် အဖွဲ့ဝင်တွေက ကိုယ့်အတွက် ရွာသီးခြားစီခွဲထားပြီး ၂ ပတ်တစ်ကြိမ် (သို့) လစဉ် သွားရောက်ပြီး စာကြည့်တိုက်ဆိုင်ရာ အခြေခံ လိုအပ်ချက်တွေဖြည့်ဆည်းပေးတာ ဆွေးနွေးညှိနှိုင်းတာတွေလုပ်ရပါမယ်။ နှစ်နဲ့ချီပြီး လုပ်ရပါလိမ့်မယ်။ ကိုယ်က ရွာခံတွေကို များများ empowerment လုပ်ပေးနိုင်လေလေ မြန်မြန် capacity ရှိလာလေလေ ဖြစ်ပါမယ်။



    သန့်စင်အောင်
Youth Initiative Group

No comments:

Post a Comment

ရွှင်လန်းချမ်းမြေ့ပါစေ။

Related Posts Plugin for WordPress, Blogger...