Monday, December 3, 2012

ရှေ့သွားနောက်လိုက်ညီကြပါစေ


မြန်မာစကားတွင် ရှေ့သွားနောက်လိုက်ညီသည်ဆိုတာရှိသည်။ ဒီစကားလုံးလေးက အိမ်ထောင်သည်လင်မယားနှစ်ယောက်ကို အဓိကထားရည်ညွှန်းကာ သုံးစွဲလေ့ရှိပါတယ်။ လင်နဲ့မယားဟာ အိမ်တွင်းရေးမှာ၊ ရပ်ရေးရွာရေးမှာ၊ သာသနာရေး အစရှိသည်တို့မှာ နှစ်ဦးသားမငြီးမငြူ တက်ညီလက်ညီပါဝင်လုပ်ဆောင်လေ့ရှိတာကို ဘေးပတ်ဝန်းကျင်ကလူတွေကနေ အားရ၀မ်းသာဖြစ်လှလွန်းလို့ ဒီလင်ဒီလင်မယားကတော့ ရှေ့သွားနောက်လိုက်ညီလိုက်တာဆိုပြီး ချီးမြှောက်တဲ့အနေနဲ့၊ မုဒိတာပွားတဲ့အနေနဲ့ ပြောလေ့ဆိုလေ့ရှိကြပါတယ်။ ဒီလိုပြောသံကိုကြားလိုက်တာနဲ့တင် ကြားရသူရဲ့စိတ်ထဲမှာလည်း ၀မ်းမြောက်ဝမ်းသာဖြစ်ကာ ထိုလင်ထိုလင်မယားအပေါ်လည်း လေးစားချစ်ခင်စိတ်တို့ ဆထက်တံပိုးတိုးလို့လာစေပါတယ်။ ထိုကဲ့သို့သော အိမ်ထောင်မိသားစုမျိုးကို လူတိုင်းကလေးစားအားကျလေ့ရှိကြပါတယ်။

မိသားစုဆိုတာဟာ လောကလူမှုအဖွဲ့အစည်းရဲ့ အသေးဆုံးအဖွဲ့အစည်းလေးပါပဲ။ မိသားတစ်စု၊ ရပ်ကွက်တစ်ခု၊ မြို့နယ်တစ်ခု၊ နိုင်ငံတစ်နိုင်ငံစသဖြင့် ဆက်စပ်စဉ်းစားကြည့်မယ်ဆိုရင် ရှေ့သွားနောက်လိုက်ညီတယ်ဆိုတဲ့စကားဟာ ကောင်းမွန်စွာအကျုံးဝင်တယ်ဆိုတာကို တွေ့ရမှာပါ။ မိသားစုတစ်စုမှာ လင်နဲ့မယားရှေ့သွားနောက်လိုက်ညီတယ်ဆိုရာမှာ လင်မယားနှစ်ယောက် အတွေးအခေါ် အသိဥာဏ်အဆင့်အတန်း တူညီမှုကနေ တက်ညီလက်ညီလုပ်ကိုင်ဆောင်ရွက်မှုဆိုတဲ့ အကျိုးတရားလေးကိုဖြစ်ပေါ်စေတာပါ။ ထိုအကျိုးတရားကြောင့်ပဲ လူဘုံဗိုလ်ပါအလယ်မှာ တင့်တယ်ခြင်းအဖြစ်ကိုရောက်ရှိစေတာပါ။ ဒါ့ကြောင့် ဒီလိုအကျိုးတရားကိုဖြစ်ပေါ်စေတဲ့ အဓိကအကြောင်းအရင်းကတော့ မိသားစုဝင်တွေထဲမှာ အသိဥာဏ်ပညာအဆင့်အတန်း တန်းတူညီတူရှိခြင်းပါ။

မိသားစုတစ်စုကဲ့သို့ပင် မြို့ရွာနိုင်ငံတို့တွင်လည်း လင်နှင့်မယားကဲ့သို့ဖြစ်နေသော အုပ်ချုပ်သူလူတန်းစားနှင့် တိုင်းသူပြည်သားတို့သည်လည်း ရှေ့သွားနောက်လိုက်ညီဖို့ အထူးပင်လိုအပ်လှပါတယ်။ နိုင်ငံရေး၊စီးပွားရေး အစစအဆင်ပြေ ချောမွေ့နေသော နိုင်ငံတစ်နိုင်ငံတွင် နောက်လိုက်ဖြစ်သော တိုင်းသူပြည်သားတို့၏ အရေးပါမှုဟာ မသိသာလှသော်လည်း နိုင်ငံရေးတည်ငြိမ်အေးချမ်းမှုမရှိသော၊ အပြောင်းအလဲကာလတွင်ရောက်ရှိနေသော နိုင်ငံများတွင်မူ နောက်လိုက်များဖြစ်ကြသော တိုင်းသူပြည်သားတို့၏ အခန်းကဏ္ဍသည် အထူးပင်အရေးကြီးလှပေသည်။ အမိနိုင်ငံတော်ကြီး မဏ္ဍိုင်သုံးရပ်တည့်မတ်ဖို့၊ အမိနိုင်ငံတော်ကြီး အလားအလာကောင်းဖို့ ၊ အမိနိုင်ငံတော်ကြီး ကောင်းမွန်မှန်ကန်သော လမ်းကြောင်းပေါ်ရောက်ဖို့ ထိန်းကျောင်းပြုပြင်ပေးရေးသည် ထိုတိုင်းသူပြည်သားတို့၏ လက်ဝယ်တွင်ရှိလေသည်။

ထိုသို့အမိနိုင်ငံတော်ကြီး လမ်းကြောင်းမှန်ပေါ်တွင် အရှိန်အဟုန်နှင့်သွားနိုင်ရန်အတွက် ပထမဦးစွာ တိုင်းသူပြည်သားတို့က မိမိတို့တွင်တာဝန်ရှိသည်ဟူသော တာဝန်သိစိတ်ရှိရပေမည်။ ထိုကဲ့သို့ တာဝန်သိစိတ်အရေးကြီးလှသလို နောက်ထပ်အရေးအကြီးဆုံးတစ်ခုမှာ ဥာဏ်ပညာအသိစိတ်ပင်ဖြစ်လေသည်။ တာဝန်သိသိဖြင့် လုပ်ကိုင်ဆောင်ရွက်ကြသော်လည်း ဥာဏ်မပါပါက တက်မပါသောလှေကဲ့သို့ဖြစ်တတ်လေသည်။ နိုင်ငံသူနိုင်ငံသားတို့၏ အသိဥာဏ်ပညာနိမ့်ကျနေပါက ဘေးမှသွေးထိုးလှုံ့ဆော်သူတို့၏နောက်သို့ အလွယ်တကူပါသွားတတ်ပေသည်။

တိုင်းရေးပြည်ရေးဟူသည်မှာ နက်နဲသိမ်မွေ့သောသဘောရှိလေသည်။ အပေါ်ယံအခင်းအကျင်းများကို မြင်ရုံဖြင့်အလွယ်တကူဆုံးဖြတ်သင့်သည် မဟုတ်ပေ။ ပြသနာရပ်တစ်ခုကိုဖြေရှင်းရာတွင် ယင်းပြသနာရပ်ဖြစ်ပေါ်ရခြင်း၏ အကြောင်းအရင်းများကို သိရှိဖို့လိုပေသည်။ ပြသနာရပ်များ၏ အဓိကအကြောင်းအရင်းများကို သေချာစွာသိရှိခြင်းမရှိဘဲ ကောင်းသည်ဆိုးသည် ပြောဆိုနေကြခြင်းသည် ကောင်းသောအရာမဟုတ်ပေ။ အမှန်တရားနှင့် သွေဖယ်ဖို့များလေသည်။ ထို့ပြင် ဒီမိုကရေစီစနစ်၏ အဓိကအနှစ်သာရတစ်ခုမှာ မိမိလိုချင်သောခေါင်းဆောင်ကို မိမိတို့ကိုယ်တိုင်ရွေးချယ်ယူခြင်းဖြစ်လေသည်။
မြန်မာ့သမိုင်း၊ ကမ္ဘာ့သမိုင်းကိုကြည့်လိုက်လျင် မရောက်သင့်သောလူလက်ထဲသို့ အာဏာကျရောက်ခဲ့သောကြောင့် တိုင်းသူပြည်သား၊ ကမ္ဘာသူကမ္ဘာသားတို့ အတိဒုက္ဒအကြီးအကျယ်ရောက်ခဲ့ကြရလေသည်။

တလောကဖတ်ရှုနေမိခဲ့သော ABSDF ကျောင်းသားများအသင်းရဲ့ ပါဂျောင်လူသတ်မှုကြီးတွေကို တွေ့ရဖတ်ရတာလည်း အထူးပင်စိတ်မကောင်းဖြစ်ရလေသည်။ မရောက်သင့်သောလူလက်ထဲသို့ လုပ်ပိုင်ခွင့်အာဏာ ရောက်ရှိသွားခြင်း၏ အကျိုးဆက်များပင်။ မြန်မာတို့၏ စိတ်နေသဘောထားသည် မိမိကိုယ်ကျိုးစီးပွားမထိခိုက်က မသိလိုက်မသိဘာသာနေတတ်ကြလေသည်။ တစ်စုံတစ်ယောက်က မဖြစ်သင့်သောအရာကို မဖြစ်သင့်ဘူးဟုပြောနေလျင်ပင် နောက်ကနေလိုက်လေ့မရှိပေ။
အတ္တသမားတို့က ရေတိုကိုယ့်အကျိုးစီးပွားကိုကြည့်ကာ ငါ့လည်းဘာမှဖြစ်တာမှမဟုတ်ပဲဟူ၍၎င်း၊ သဘောကောင်းမနောကောင်းသည်ဟု ကိုယ့်ကိုယ်ကိုအထင်ရှိသူတို့က ဒါကတော့ဒီလိုနဲ့ ပြီးသွားမှာပါပဲဟူ၍၎င်း ရသေ့စိတ်ဖြေကာ ပြသနာတစ်ခုမကြီးပွားခင်မှာ တားဆီးရကောင်းမှန်းမသိပဲ မသိလိုက်မသိဘာသာ နေကြလေတော့သည်။ နောက်ဆုံး အားလုံးဒုက္ခရောက်ကြမှသာလျင် နောင်တကြီးစွာရကြလျက် အဲ့ဒီတုန်းက ဘယ်ဟာကိုဘယ်သူကန့်ကွက်နေတုန်းက ငါလည်းကန့်ကွက်လိုက်ရင် ဒါမျိုးတွေဖြစ်လာမှာမဟုတ်ဘူးဆိုပြီး နောင်တကြီးစွာရကြလေတော့သည်။

ထို့ကြောင့် သမိုင်းကိုသင်ကြရမည်.. အဘယ်ကြောင့်ဆိုသော် မအရအောင်လို့ဟုဆိုသော ပညာအကျော်မြန်မာသမိုင်းပါမောက္ခကြီး၏ စကားကဲ့သို့ပင် မ်ိမိသူတစ်ပါးဖြတ်သန်းခဲ့ကြသော သမိုင်းအတွေ့အကြုံတို့ကို လက်လှမ်းမီသမျှ ဖတ်ရှုလေ့လာကာ သူတစ်ပါးတို့မှားခဲ့သော အမှားမျိုးကို မိမိတို့ထပ်မံမကျူးလွန်မိစေရန်၊ ရှောင်ရှားနိုင်စေရန်ကြိုးပမ်းအားထုတ်ရပေမည်။ သူများယောင်တိုင်းလိုက်မယောင်မိဖို့က Transition period ဟုခေါ်ဆိုသော အပြောင်းအလဲကာလမျိုးတွင် လွန်စွာအရေးကြီးပေသည်။ မိမိနိုင်ငံတော်ကြီး အစဉ်ဖွံ့ဖြိုးတိုးတက်သော လမ်းကြောင်းပေါ်တွင် အရှိန်အဟုန်ဖြင့်သွားနိုင်ရန်မှာ နိုင်ငံသူနိုင်ငံသားတို့၏ အသိဥာဏ်အဆင့်အတန်းပေါ်တွင် တိုက်ရိုက်တည်မှီနေလေသည်။ အထက်တွင်ဆိုခဲ့သလို မိသားစုတစ်စုတွင် လင်နှင့်မယားရှေ့သွားနောက်လိုက်ညီပါက အများတကာတို့၏ ချီးမွမ်းခြင်းကိုခံရလျက် လူဘုံဗိုလ်ပါအလယ်တွင် တင့်တယ်သကဲ့သို့ နိုင်ငံတော် (အုပ်ချုပ်သူ)နှင့် ပြည်သူပြည်သားတို့ ရှေ့သွားနောက်လိုက်ညီမှသာလျင် ကမ္ဘာပေါ်တွင် ၀င့်ဝင့်ထည်ထည်နှင့်နေနိုင်သော၊ အများလေးစားရသောနိုင်ငံတစ်ခုအဖြစ်သို့ ရောက်ရှိနိုင်မည်ဖြစ်လေသည်။

မောင်မျိုး(စက်မှု)






No comments:

Post a Comment

ရွှင်လန်းချမ်းမြေ့ပါစေ။

Related Posts Plugin for WordPress, Blogger...