Tuesday, June 11, 2013

သူကြွယ်မဟုတ်သောသူဌေး နှင့် ပညာမတတ်သောဆရာ

ဇွန် ၁၀၊ ရန်ကုန်တိုင်းနေ့စဉ် သတင်းစာ

 နိုင်ငံတစ်နိုင်ငံမှာ သူတို့ရဲ့ကိုယ်ပိုင် ယဉ်ကျေးမှု သရုပ်သကန်လေးတွေ ရှိတတ်ကြပါတယ်။ တချို့မှာ ချစ်စရာကောင်းသလို၊ တချို့သော အရာတို့ကတော့ စိတ်ရှုပ်ထွေးစရာ၊ အကောက်အယူလွဲမှား စရာလေးတွေ ဖြစ်တတ်ပါတယ်။ ကိုရီးယားနိုင်ငံမှာလည်း ထိုနည်း၎င်းပါပဲ..။ သူတို့မှာ ထူးခြားတဲ့ နာမ်စားအသုံးပြုပုံလေးတွေ ရှိပါတယ်။ ထိုထဲကမှ ကျွန်တော်သဘောအကျဆုံးဖြစ်တဲ့ သူဌေးနှင့် ဆရာဆိုတဲ့ နာမ်စားလေးတွေ အကြောင်းပြောပြချင်ပါတယ်။
ကျွန်တော်ရောက်စက ကိုရီးယားစာ စပြီးနဲနဲလေ့လာမိတဲ့အခါမှာ သူဌေးဆိုတဲ့စကားလုံးနဲ့ ကိုယ်ကပညာရေးဘက်ကဖြစ်တဲ့အတွက် ဆရာဆိုတဲ့နာမ်စားကို စတင်ပြီးကျက်မှတ်မိပါတယ်။ အဲ့ဒီနောက် ဒီလိုပဲနေ့စဉ်ကျော်ဖြတ်နေရင်းနဲ့ တစ်ယောက်ကိုသူဌေးခေါ်သံကြားလိုက်ရင် ကိုယ်ကလည်း ကိုယ်မတောက်တခေါက် နားလည်ကြောင်းလည်း ကြွားချင်တာကြောင့် သူကဘယ်ကုမ္ပဏီက သူဌေးလဲလို့မေးမိ၊ သူတို့ ကိုရီးယားတွေ လူတစ်ယောက်ကို ဆရာခေါ်တာကြားပြန်ရင်လည်း ကိုယ်လည်းသူက ဘာမေဂျာသင်တဲ့ဆရာလည်း မေးမိပါတော့တယ်။

အဲ့ဒီအခါမှာ သူတို့ရှင်းပြတာကို လုံးစေ့ပတ်စေ့ နားမလည်ပေမဲ့ သူတို့သူဌေးခေါ်တိုင်း သူဌေးမဟုတ်သလို၊ သူတို့ဆရာခေါ်တိုင်းလည်း ဆရာမဟုတ်ဘူးဆိုတာ
ပါပဲ။ ကျွန်တော်တို့ကတော့ သူဌေးဆိုတာဟာ တကယ်ကိုချမ်းသာတဲ့ သူတွေကိုမှသာ ခေါ်ဆိုလေ့ရှိတဲ့အသုံးအနှုန်းဖြစ်သလို၊ ဆရာဆိုတာလည်း တကယ်ကို စာသင်ကြားပြသပေးတဲ့ ဆရာဆိုမှ ဆရာလို့ခေါ်ဆိုလေ့ရှိကြတာပါ။ သို့သော် ဒီနိုင်ငံမှာတော့ နဲနဲထူးဆန်း နေပါတော့တယ်။

ဒီလိုနဲ့ ရက်တွေကြာလာပြီး တဖြည်းဖြည်း သိလာရတာကတော့ ကိုရီးယားတွေဟာ တစ်စုံတစ်ဦးနဲ့ အလုပ်အရပက်သက်လာပြီဆိုရင် ထိုသူကို လေးစားသမှုနဲ့ သူဌေးဆိုပြီးခေါ်ကြတာပါ။ ကျွန်တော်တို့ နိုင်ငံမှာလို သူတို့သူဌေးခေါ်တာနဲ့ ကိုယ့်မျက်စိထဲမှာ အကြီးကြီးသွားမတွေးလိုက်ပါနဲ့။ ကျွန်တော်တို့ အိမ်တွေမှာတခုခုလိုအပ်ရင် ခေါ်ခိုင်းဖို့အိမ်ပိုင်ရှင်က ထားပေးထားတဲ့ လူကိုပင်လျင် လေးစားသမှုနဲ့ တချို့က ဦးလေးလို့ မခေါ်ဘဲ သူဌေးလို့ခေါ်ကြပါတယ်။ အိမ်ပိုင်ရှင်ဆိုလည်း သူဌေးပဲခေါ်ကြတာပါပဲ။ အဲ့ဒီမှာ သူဌေးချင်းထပ်ပြီး ဘယ်သူကဘာမှန်းကို မသိတော့လောက်အောင် မျက်စိတွေလည်တော့တာပါပဲ။

နောက်ပြီး ဆရာဆိုတဲ့အခေါ်အဝေါ်ဟာလည်း ထိုနည်း၎င်းပါပဲ၊ အပြင်မှာတွေ့တွေ့ချင်း လူတစ်ယောက်ကိုလည်း ယဉ်ယဉ်ကျေးကျေး ခေါ်တဲ့အနေနဲ့ ဆရာလို့ခေါ်တတ်ပါတယ်။ စာသင်နေသူကိုမှ ဆရာခေါ်တာ မဟုတ်ပါဘူး။ ကျွန်တော်တို့ နိုင်ငံမှာတော့ သက်ဆိုင်ရာနာမ်စားများ ဦးလေးအရွယ်ဦးလေး၊ မောင်အရွယ်မောင်၊ သားအရွယ်သား၊ အဘအရွယ် ဘဘလို့သုံးနှုန်းကြပေမယ့် ကိုရီးယားမှာတော့ ယဉ်ကျေးတဲ့အနေနဲ့ သူဌေးနဲ့ဆရာကို တော်တော်များများကို ကိုယ်စားပြုပြီး သုံးစွဲတာတွေ့ရပါတယ်။

ဒါ့ကြောင့် ကိုရီးယားလူမျိုးများနဲ့ ဆက်ဆံတဲ့အခါ သူဌေးမင်း၊ ဆရာဆိုတာတွေဟာ အမြဲလိုလိုကို ကြားရမှာဖြစ်ပါတယ်။ သို့သော် သူဌေးမင်းဆိုတာနဲ့ ခုနှစ်ရက်ခုနှစ်လီလှူတမ်းတဲ့ ကိုယ့်သူဌေးမင်းများနှင့် တန်းတူမဟုတ်ကြောင်း၊ ဆရာလို့ခေါ်သံကြားတိုင်း မိမိတို့ရဲ့ အနန္တဂိုဏ်းဝင် ဆရာများလို မဟုတ်ကြောင်း ကွဲလွဲနိုင်ကြောင်းကိုတော့ သတိချပ်ကြစေချင်ပါသည်။

မောင်မျိုး (စက်မှု)


No comments:

Post a Comment

ရွှင်လန်းချမ်းမြေ့ပါစေ။

Related Posts Plugin for WordPress, Blogger...