Monday, September 9, 2013

နိုင်ငံတကာ အဆင့်မီ တက္ကသိုလ်တစ်ခုဖြစ်ဖို့

September 09~15 The Voice Weekly

မြန်မာ့နိုင်ငံရေးအပြောင်းအလဲနဲ့အတူ မြန်မာနိုင်ငံရဲ့ ပညာရေးကို အလျင်အမြန်ပြုပြင်ပြောင်းလဲဖို့ လိုအပ်ပြီဆိုတဲ့ အသံတွေကလည်း မြန်မာနိုင်ငံမှာ တော်တော်ကို ရေပမ်းစားရိုက်ခတ်နေပါတယ်။ ထိုအသံနှင့်အတူ မြန်မာနိုင်ငံ၏ ပညာရေးကဏ္ဍကို ကမ္ဘာ့အဆင့်မီ မြှင့်တင်ဖို့ကြိုးစားမည့် ခြေလှမ်းများကိုလည်း တွေ့မြင်နေရပါတယ်။ ကမ္ဘာ့အဆင့်မီ တက္ကသိုလ်တစ်ခုဆိုတာ အဘယ်ကဲ့သို့သော အခြင်းအရာများနဲ့ သတ်မှတ်ကန့်သတ်ထားပါသလဲ။ ကမ္ဘာပေါ်မှာရှိတဲ့ တက္ကသိုလ်တွေကို နှစ်စဉ်နှစ်တိုင်း သက်ဆိုင်ရာတက္ကသိုလ်၏ ဘက်စုံအောင်မြင်မှုများပေါ်မူတည်ကာ အဆင့်သတ်မှတ် ထုတ်ပြန်လေ့ရှိတဲ့ ကမ္ဘာကျော်အဖွဲ့အစည်းတွေ အမြောက်အများ ရှိပါတယ်။
တရုတ်ပြည် Shanghai Jiao Tong University မှ ထုတ်ဝေသော Academic Ranking of World Universities (ARWU), အင်္ဂလန် Times Higher Education (THE) မှ ထုတ်ဝေသော Times Higher Education World University Rankings, QS World University Rankings နှင့် ရုရှမှထုတ်ဝေသော Global University Ranking တို့ဟာ တက္ကသိုလ်များ ကမ္ဘာ့အဆင့်ထုတ်ပြန်ပေးရာတွင် အများအသိအမှတ်ပြုခံရတဲ့ အဖွဲ့အစည်းများဖြစ်ကြပါတယ်။ ယင်းတို့ထဲမှ Times Higher Education World University Rankings ကတော့ သြဇာအရှိဆုံးဖြစ်ပါတယ်။ ထိုအဖွဲ့အစည်းများမှ တက္ကသိုလ်များ၏ အဆင့်အတန်းကို အကဲဖြတ်ရာမှာ သုံးလေ့ရှိတဲ့ စံချိန်စံညွှန်းတွေကို ခြုံငုံကြည့်မယ်ဆိုရင် အောက်ပါအတိုင်းတွေ့ရပါတယ်။

သုတေသန

တက္ကသိုလ်တစ်ခုရဲ့ သုတေသနလုပ်ငန်းတွေဟာ နိုင်ငံတစ်နိုင်ငံအတွက် ဘယ်လောက်အထိ အမှန်တကယ် အကျိုးပြုနိုင်သလဲ၊ ပြင်ပလုပ်ငန်းတွေကနေ သုတေသန၀င်ငွေတွေ ဘယ်လောက်ဝင်သလဲ၊ သုတေသနတွေကနေ နိုင်ငံတကာ အကျိုးပြုစာတမ်းတွေ ဘယ်လောက်ထုတ်ဝေနိုင်သလဲ၊ ထိုထုတ်ဝေလိုက်တဲ့ သုတေသနစာစောင်တွေကို တခြားပညာရှင်တွေက ဘယ်လောက်အထိ ယုံယုံကြည်ကြည် ကိုးကားမှုပြုကြသလဲ၊ နောက်ပြီး ထိုတက္ကသိုလ်ကပညာရှင်တွေ နိုဘယ်ဆု၊ ဖီးမက်ဒယ်ဆုစတဲ့ နိုင်ငံတကာ ဆုတံဆိပ်တွေ ဘယ်လောက်များများ ဆွတ်ခူးနိုင်သလဲဆိုတဲ့ အချက်တွေပေါ်မူတည်ပြီး တက္ကသိုလ်တစ်ခုရဲ့ သုတေသန အဆင့်အတန်းကို သတ်မှတ်ကြပါတယ်။

ပညာသင်ကြားရေး

တက္ကသိုလ်ပညာ သင်ကြားရေးဆိုတာ အနာဂတ်ရဲ့ တောက်ပတဲ့ ကြယ်ပွင့်လေးတွေကို ပြုစုပေးထောင်ပေးရတဲ့၊ နိုင်ငံအတွက် ကောင်းကျိုးပြုနိုင်တဲ့ သုတေသနတွေကို လုပ်နိုင်စွမ်းတဲ့ ပညာရှင်လေးတွေကို မွေးထုတ်ပေးရတဲ့ အလုပ်ပဲဖြစ်ပါတယ်။ ကျောင်းသား၊သူများအတွက် လိုအပ်တဲ့ သင်ထောက်ကူ ပစ္စည်းများရှိခြင်း၊ တက်ကျွမ်းပြီး စေတနာရှိတဲ့ ဆရာ၊ဆရာမများ ပေါများခြင်းစတဲ့ အချက်တွေဟာ ပညာသင်ကြားရေးအတွက် အရေးကြီးပါတယ်။ အဲ့ဒီလို ပြည့်စုံနေမှသာ ကျောင်းသား၊သူတွေဟာ မိမိတို့ရဲ့ တက္ကသိုလ်ကြီးမှာ ပညာသင်ကြားရတာကို ကျေနပ်ပျော်ရွှင်ပြီး တီထွင်ဥာဏ် ကွန့်မြူးနိုင်ကြမှာဖြစ်ပါတယ်။
ဆရာဆရာမအရေအတွက်နဲ့ ကျောင်းသားအရေအတွက် အချိုးဟာလည်း ပညာသင်ကြားရေးမှာ အဓိက အခန်းကဏ္ဍက ပါဝင်ပါတယ်။ ဆရာနဲ့ကျောင်းသား အချိုးညီညီရှိမှသာလျင် ပညာသင်ကြားရေးမှာ ပိုင်ပိုင်နိုင်နိုင်ရှိပြီး လိုရာခရီးရောက်မှာဖြစ်ပါတယ်။ ဘွဲ့ကြိုကျောင်းသားအရေအတွက်နဲ့ ဆရာကျောင်းသားအချိုး၊ မဟာဘွဲ့၊ ဒေါက်တာဘွဲ့ရအရေအတွက်၊ ပညာသင်ကြားရေးမှဝင်ငွေတို့ကို တွက်ချက်ကာ ထိုတက္ကသိုလ်၏ ပညာသင်ကြားရေးအဆင့်အတန်းကို ဆုံးဖြတ်ကြပါတယ်။

အလုပ်အကိုင် ရရှိမှု

တက္ကသိုလ်တစ်ခုမှ ဘွဲ့ရပြီးသွားသော ကျောင်းသားများ အလုပ်အကိုင် ရရှိနိုင်မှုအနည်းအများဟာလည်း အရေးကြီးတဲ့ အချက်တစ်ချက်ဖြစ်ပါတယ်။ ဘွဲ့ရကျောင်းသားတစ်ယောက်ဟာ ယခုခေတ်လို ယဉ်ကျေးမှုပေါင်းစုံ ရောယှက်နေတဲ့ အဖွဲ့အစည်းတွေထဲမှာ ထိထိရောက်ရောက် ပါဝင်လုပ်ကိုင်နိုင်ခြင်း၊ လုပ်ဖော်ကိုင်ဖက်များနှင့် သက်ဆိုင်ရာ ပရောဂျက်များကို ကောင်းမွန်စွာ ကိုင်တွယ်နိုင်ခြင်းတို့ဟာ သက်ဆိုင်ရာတက္ကသိုလ်ကနေ ကျောင်းသားကို ဘယ်လောက်အထိ အလုပ်ခွင်ထဲမှာ ၀င်ရောက်လုပ်ကိုင်နိုင်ဖို့အတွက် အဆင်သင့်ဖြစ်အောင် ပြုစုပျိုးထောင်ပေးတယ်ဆိုတာကို ပြသရာရောက်ပါတယ်။

လိုအပ်သော အသုံးအဆောင်ပစ္စည်းများ ပြည့်စုံမှု

ကျောင်းသား၊သူများအတွက် လိုအပ်သော အားကစားလုပ်ရာနေရာ၊ အားကစား ပစ္စည်းပစ္စယများပြည့်စုံ လုံလောက်မှုရှိခြင်း၊ ကျန်းမာရေးအတွက် လိုအပ်သော ဆေးရုံဆေးပေးခန်းများရှိခြင်း အစရှိသည်တို့ဟာလည်း ကျောင်းကောင်းတစ်ခုရဲ့ ၀ိသေသ လက္ခဏာများပဲဖြစ်ပါတယ်။ ကျောင်းသား၊ ကျောင်းသူများနဲ့ သက်ဆိုင်သော လူမှုရေး၊ ဘာသာရေးစတဲ့ အသင်းအဖွဲ့များရှိခြင်းဟာလည်း ကျောင်းသား၊သူများရဲ့ စိတ်ကျန်းမာရေးအတွက် အရေးကြီးတဲ့ အချက်တစ်ချက်အဖြစ် သတ်မှတ်လာကြတာကို တွေ့ရပါတယ်။

နိုင်ငံတကာနဲ့ ဆက်သွယ်ဆောင်ရွက်မှု

တက္ကသိုလ်တစ်ခုမှာ နိုင်ငံတကာ ကျောင်းသားများပေါများခြင်း၊ နိုင်ငံရပ်ခြားမှ လာရောက်သင်ကြားပေးနေသော ဆရာ၊ဆရာမများ ပေါများခြင်းဟာလည်း ထိုတက္ကသိုလ်အနေဖြင့် နိုင်ငံတကာမှာ ဘယ်လောက်အထိ အောင်မြင်သလဲဆိုတာပြသနေတာပဲဖြစ်ပါတယ်။ တက္ကသိုလ်တစ်ခုအနေဖြင့် နိုင်ငံတကာရှိ တက္ကသိုလ်များနှင့် အတူလက်တွဲကာ သုတေသနပြုလုပ်ခြင်း၊ မိမိတက္ကသိုလ်က ကျောင်းသားများ နိုင်ငံတကာ တက္ကသိုလ်များတွင် လွယ်လင့်တကူ ပညာသင်ကြားနိုင်မှုရှိခြင်း စတဲ့အချက်တွေဟာလည်း ထိုတက္ကသိုလ်ရဲ့ နိုင်ငံတကာမှာ ၀င်ဆန့်နိုင်မှု အတိုင်းအတာပဲဖြစ်ပါတယ်။

ဆန်းသစ်တီထွင်နိုင်မှု

စီးပွားရေး၊ လူမှုရေး၊ သိပ္ပံအစရှိတဲ့ နယ်ပယ်အသီးသီးမှာ အသုံးဝင်တဲ့ ဆန်းသစ်တီထွင်မှုတွေ ဘယ်လောက်အတိုင်းအတာထိ ထုတ်လုပ်ပေးနိုင်သလဲဆိုတာဟာလည်း တက္ကသိုလ်တစ်ခုအတွက် အထူးအရေးကြီးပါတယ်။ တက္ကသိုလ်တစ်ခုအနေနဲ့ မိမိပတ်ဝန်းကျင်အတွက်၊ နိုင်ငံအတွက်၊ ကမ္ဘာကြီးတစ်ခုလုံးအတွက် အသုံးဝင်တဲ့ တစ်စုံတစ်ရာ ထုတ်လုပ်တီထွင်နိုင်မှု မရှိဘူးဆိုရင် ထိုတက္ကသိုလ်ဟာ ကမ္ဘာ့အဆင့်အတန်းဝင် တက္ကသိုလ်တစ်ခုလို့ ခေါ်ဆိုနိုင်မှာ မဟုတ်ပါဘူး။ ကိုယ့်လူမှုပတ်ဝန်းကျင်အတွက် ကောင်းကျိုးပြုနိုင်ဖို့အတွက် တက္ကသိုလ်တွေဟာ အစဉ်အမြဲကြိုးစား အားထုတ်နေရတာဖြစ်ပါတယ်။

လက်လှမ်းမှီမှု

တက္ကသိုလ်တစ်ခုဟာ ကျောင်းသား၊ကျောင်းသူများ လက်လှမ်းမီတဲ့ အတိုင်းအတာအတွင်း ရှိမရှိဆိုတာဟာလည်း အဓိက အချက်တစ်ခုဖြစ်ပါတယ်။ ပညာသင်ဆုများပေါများခြင်း၊ ပညာသင်ထောက်ပံ့ကြေးများ၊ ချေးငွေများပေါများမှု၊  မသန်မစွမ်းသူများ အလွယ်တကူ တက်ရောက်နိုင်မှုရှိမရှိ (ကမ္ဘာ့အဆင့်မီမြို့ကြီးများ၊ တက္ကသိုလ်များတွင် မသန်မစွမ်းသူများဟာ လျှပ်စစ်လှည်းကလေးများနဲ့ ကြိုက်ရာနေရာသွားလာနိုင်ပါတယ်။ မြေအောက်ရထား လှေကားအတက်အဆင်းများတွင်လည်း ထိုသူတို့အား အတက်အဆင်းကူညီပေးရန် ၀န်ထမ်းများ သီးသန့်ထားရှိပေးပါတယ်။ မြို့ပြစီမံကိန်း ဒီဇိုင်းဆွဲမည့် မြန်မာနိုင်ငံအနေဖြင့် ထိုကဲ့သို့သောအချက်များကိုလည်း ထည့်သွင်းစဉ်းစားသင့်ပါတယ်)၊ အမျိုးသား အမျိုးသမီး တန်းတူညီမျှအခွင့်အရေးရှိမှုဆိုတဲ့ အချက်တွေအပေါ်ကိုလည်း တက္ကသိုလ်အဆင့်အတန်း သတ်မှတ်ရာမှာ ထည့်သွင်းတွက်ချက်ကြပါတယ်။

အထက်ပါအချက်တွေနဲ့ မြန်မာနိုင်ငံ တက္ကသိုလ်ကောလိပ်တွေကို ချိန်ထိုးကြည့်မယ်ဆိုရင် အချက်တိုင်းမှာ လိုအပ်ချက်တွေ အထူးမြင့်မားနေတာကို တွေ့ရမှာဖြစ်ပါတယ်။ လက်ရှိအချိန်တွင် ပညာရေးပြုပြင်ပြောင်းလဲမှုများ၏ အကျိုးဆက်အနေဖြင့် အဆင့်မြင့်တက္ကသိုလ်များ Centers of Excellence (နိုင်ငံတကာတွင် ထိုသို့သော တက္ကသိုလ်များကို Flagship Universities ဟုသုံးနှုန်းပြီး၊ တက္ကသိုလ်ရှိ ထူးချွန်ဌာနများ၊ နာမည်ကြီး LAB များကိုသာ Centers of Excellence ဟုခေါ်ဆိုကြပါသည်။)  ဆိုပြီး သုတေသနဦးစားပေး တက္ကသိုလ်များကို ကြိုးစားအကောင်အထည်ဖော်လာတာကို တွေ့ရပါတယ်။ မည်သို့ပင် ကြိုးစားအကောင်အထည်ဖော်နေသည်ဆိုစေကာမူ တက္ကသိုလ်တစ်ခု အောင်မြင်ဖို့အတွက် အခြေခံအကျဆုံးအချက်ကတော့ မိမိတက္ကသိုလ်ကို ကိုယ်ပိုင်လွတ်လွတ်လပ်လပ် စီမံခန့်ခွဲနိုင်မှုရှိမရှိဆိုသည့်အချက်ပင်ဖြစ်သည်။ နိုင်ငံတကာ တက္ကသိုလ်များတွင် တက္ကသိုလ်အာဏာပိုင်တို့ကသာ မိမိတို့ကျောင်း၏ ကိစ္စအ၀၀ကို ကိုင်တွယ်ဆောင်ရွက် အကောင်အထည်ဖော်ကြသလို မြန်မာနိုင်ငံ တက္ကသိုလ်ကောလိပ်များတွင်လည်း တက္ကသိုလ်၏ ကိစ္စအ၀၀ကို တက္ကသိုလ်အာဏာပိုင်တို့ကသာ ကိုင်တွယ်ဆောင်ရွက်စေသင့်သော အချိန်ကျရောက်လာပြီဖြစ်သည်။

ခုချိန်ခါတွင် နိုင်ငံတကာမှ အကူအညီများ မြန်မာနိုင်ငံကို ၀င်ရောက်လာရာမှာ ပညာရေးအကူအညီများလည်း အပါအ၀င်ပင်ဖြစ်သည်။ ကြီးကြီးမားမား အစိုးရချင်းချိတ်ဆက် ၀င်ရောက်လာသော ပညာရေးအကူအညီများအတွက် အဆင်ပြေနိုင်သော်လည်း တက္ကသိုလ်အချင်းချင်း၊ ဌာနတစ်ခုချင်း ချိတ်ဆက်မှုမျိုး ပြည်ပမှ ၀င်ရောက်လာပါမူ ယခင်လုပ်ရိုးလုပ်စဉ်များအတိုင်းသာ ဆိုပါက တစ်ဖက်မှ စိတ်ပျက်ကာ နောက်လှည့်သွားမည်သာဖြစ်သည်။ ထိုကဲ့သို့သော ကိစ္စရပ်များကို လျင်လျင်မြန်မြန် အကောင်အထည်ဖော်နိုင်ရန်အတွက် သက်ဆိုင်ရာဝန်ကြီးဌာနမှ သက်ဆိုင်ရာတက္ကသိုလ်ရှိ တက္ကသိုလ်အာဏာပိုင်တို့အား ကိုယ်ပိုင်ဆုံးဖြတ်လုပ်ကိုင်စေခြင်းမျိုးကို ခွင့်ပြုသင့်ပေသည်။ ဌာနဆိုင်ရာများအနေနဲ့ ယခင်က အလုပ်မဖြစ်ခဲ့သော နှောင့်နှေးကြန့်ကြာနေတတ်သော လုပ်ငန်းစဉ်များကို လေ့လာသုံးသပ်ကာ မလိုလားအပ်သော လုပ်ငန်းစဉ်များကို ဖျက်သိမ်းခြင်း၊ လျင်လျင်မြန်မြန် လုပ်ငန်းအကောင်အထည်ဖော်နိုင်မည့် လုပ်ငန်းစဉ်များနှင့် အစားထိုးလုပ်ကိုင်စေခြင်းမျိုးကို ပထမဦးစားပေးအနေဖြင့် အလေးပေးလုပ်ဆောင်သင့်ပေသည်။ လတ်တလော လုပ်နိုင်သော၊ လုပ်သင့်သော နောက်တစ်ခုကို အကြံပြုပြောဆိုရမည်ဆိုလျင် တက္ကသိုလ်များတွင် ခေတ်မီစာအုပ်စာတမ်းများ ပြီးပြည့်စုံစွာဖြည့်ဆည်းပေးပြီး၊ နိုင်ငံတကာ သုတေသနစာတမ်းများ လွယ်ကူစွာ ရှာဖွေကြည့်ရှုနိုင်ရန်အတွက်လည်း သက်ဆိုင်ရာအဖွဲ့အစည်းများနှင့် ချိတ်ဆက်ကာ အမြန်ဆုံးအကောင်အထည်ဖော်သင့်ပေသည်။ ထိုသို့လတ်တလောဖြည့်ဆည်းနိုင်သော အခြေခံလိုအပ်ချက်များကို အလျင်အမြန်ဖြည့်ဆည်းဆောင်ရွက်နိုင်မှသာ သုတေသနဆိုသောအရာကို စိတ်ကူးယဉ်နိုင်မည်ဖြစ်ပြီး နောင်ဆယ်စုနှစ်တစ်ခုနှစ်ခုအတွင်း အရှေ့တောင်အာရှတွင် တန်းဝင်တက္ကသိုလ်တစ်ခုအဖြစ်သို့ တက်လှမ်းနိုင်ပေလိမ့်မည်။

မောင်မျိုး(စက်မှု)


1 comment:

ရွှင်လန်းချမ်းမြေ့ပါစေ။

Related Posts Plugin for WordPress, Blogger...