Monday, December 15, 2014

ဝါးတွေ ထရံတွေပဲ မစုဆောင်းမိပါစေနဲ့


လူတစ်ယောက်မှာ ငယ်ဘ၀ဆိုတာဟာ အရမ်းအရေးကြီးပါတယ်။ ငယ်ရွယ်စဉ်အခါမှာ ကိုယ်ပြုခဲ့တဲ့ ကောင်းမှုဆိုးမှုကို ကိုယ်ကြီးလာတဲ့အခါမှာ ကိုယ်ပဲအဓိကခံစား စံစားရတာဖြစ်ပါတယ်။ ငယ်ရွယ်စဉ်အခါမှာ အရာရာကို ပေါ့ပေါ့ပါးပါး သတိလက်လွတ်သာ အချိန်ကုန်စေမယ်ဆိုရင် ကြီးလာရင် ဘာဖြစ်မယ်ဆိုတာကို ကိုယ့်ရဲ့အသိထဲ ခေါင်းထဲမှာ အမြဲတမ်း ပုံဖော်ကြည့်နေရပါမယ်။ ဘ၀ကို ပေါ့ပေါ့လေး ဖြတ်သန်းတယ်ဆိုတာဟာ ဘာနဲ့ အလားတူသလဲဆိုရင် ၀ါးတွေထရံတွေကို စုဆောင်းနေတာနဲ့ တူပါတယ်။ ငယ်ရွယ်စဉ် အချိန်ရှိခိုက်မှာ လုံ့လစိုက်ပြီး လုပ်သင့်လုပ်ထိုက်တာတွေကို လေးလေးနက်နက် လုပ်တဲ့သူဟာ အုတ်တွေ စတီးချောင်းတွေကို စုဆောင်းနေတာပါပဲ။ ဒီလိုနဲ့ အရွယ်ရောက်လာတော့ အုတ်တွေ စတီးချောင်းတွေ စုဆောင်းထားသူဟာ တိုက်တာအဆောက်အဦးတွေနဲ့ ဆောက်လုပ်နေနိုင်ပေမယ့် ၀ါးတွေထရံတွေသာ စုဆောင်းခဲ့သူကတော့ တဲထိုးကာသာ နေနိုင်မှာဖြစ်ပါတယ်။ ကိုယ့်ဟာကို တဲထိုးနေတာဟာ ကိုယ်တစ်ယောက်တည်းသာ နိမ့်ကျစေတာမဟုတ်ပါဘူး။ တဲဆိုတာဟာ ကိုယ်ခံအား မကောင်းတဲ့အတွက် မီးလောင်လွယ်ပါတယ်။ ဒီလို အလွယ်တကူ မီးလောင်စေနိုင်တဲ့အတွက် ကိုယ့်ပတ်ဝန်းကျင်ကိုလည်း ပူလောင် ကူးစက်စေပါတယ်။ ကိုယ့်ပတ်ဝန်းကျင်မှာပဲ သတိထားကြည့်ကြည့်ကြပါ။ ငွေကြေးချမ်းသာပါတယ်ဆိုတဲ့ မိသားစုက ပေါက်ဖွားလာတဲ့သူတွေထဲမှာတောင် အစောက ပြောခဲ့သလိုပဲ ဘ၀ကို ငယ်ရွယ်စဉ်မှာ ပေါ့ပေါ့လေး ဖြတ်သန်းခဲ့ကြတော့ ၀ါးတဲလေးသာ တည်ဆောက်နိုင်တဲ့ အသိဥာဏ်ပဲ ရှိလာကြတယ်။ ဒါထက်ဆိုးတာက ကိုယ်ခံအသိစိတ် ထိန်းချုပ်နိုင်မှုအားကလည်း နဲလေတော့ မကောင်းမှုတွေမှာ အလွယ်တကူ ပျော်မွေ့သွားကြပြန်ရော။ ဒီလိုနဲ့ သူတို့ဘေးက မိသားစုတွေကို ဒုက္ခရောက် ပူလောင်စေပြန်တော့တယ်။ ဒီလိုနဲ့ မိဘတွေ လက်ထက်က အခိုင်အမာ တည်ဆောက်ထားခဲ့တဲ့ တိုက်တာ အဆောက်အဦးတွေတောင် သူတို့ဆီက မီးကူးစက်ခံရတာကြောင့် ပြာပုံဘ၀ရောက်မတတ်ဖြစ်ရပြန်တယ်။ ဒါ့ကြောင့် ငယ်ရွယ်စဉ် အချိန်ရှိခိုက်မှာ လုံ့လစိုက်ပြီး အုတ်တွေ စတီးချောင်းတွေ စုကြပါ၊ ပေါ့ပေါ့လေးဖြစ်တဲ့ ၀ါးထရံတွေကိုပဲ စုဆောင်းမနေကြပါနဲ့။ ကိုယ့်ရဲ့ပေါ့ဆမှုဟာ ကိုယ်တစ်ယောက်တည်းမဟုတ် ကိုယ့်ပတ်ဝန်းကျင်ကိုပါ ဒုက္ခရောက်စေတတ်ပါတယ်။ အလားတူပဲ ကိုယ့်ရဲ့ ကြိုးစားအားထုတ်မှုဟာလည်း ကိုယ်ရောက်ရာ ပတ်ဝန်းကျင်ကို ကောင်းကျိုး ပြုနိုင်တယ်ဆိုတာကို အမြဲနှလုံးသွင်းထားပြီး ငယ်ဘ၀ကို လေးနက်စွာ ဖြတ်သန်းကြပါလို့ သတိပေးချင်ပါတယ်။


(NerdSpacers (NerdSpace Eng Class သင်တန်းသား) များအတွက် ပြီးခဲ့တဲ့ အပတ်က ပြောကြားခဲ့တဲ့ ဆုံးမစကားကို ဆီလျော်အောင် ပြန်လည် ရေးသားထားခြင်းဖြစ်ပါတယ်။)

No comments:

Post a Comment

ရွှင်လန်းချမ်းမြေ့ပါစေ။

Related Posts Plugin for WordPress, Blogger...